އިޒްރޭލުގައި ކުރިއަށްއޮތް އޮކްޓޫބަރު މަހުގެ ހަތާވީސްވަނަ ދުވަހު އާއްމު އިންތިޚާބު ބާއްވާނެއެވެ. އެދުވަހަކީ ބޮޑުވަޒީރު ބެންޖަމިން ނަތަންޔާހޫގެ ވެރިކަން ކަފުން ކުރެވޭނެ ދުވަސް ބާވައެވެ. އާނއެކެވެ. ނިޝާންތައް ފެންނަނީ އެގޮތަށެވެ. ޚިޔާލު އެއްކުރުމުގެ ސާރވޭތަކުން ދައްކަނީ ނަތަންޔާހޫ އާއި އޭނާގެ ބައިވެރިންނަށް ގާނޫނުހަދާ މަޖިލީހުގެ އަޣުލަބިއްޔަތު ގެއްލޭނޭ ކަމަށެވެ. ބޮޑުތަނުންނެވެ. ގާނޫނުހަދާ މަޖިލީހުގެ އަޣުލަބިއްޔަތު ގެއްލިއްޖެނަމަ ނަތަންޔާހޫގެ ވެރިކަންވެސް ގެއްލޭނެއެވެ. ނިމޭނެއެވެ. އިޒްރޭލުގެ ޕާލަމެންޓް ނުވަތަ ގާނޫނުހަދާ މަޖިލީހަށް ކިޔަނީ ކެނެސެޓެވެ. އެތާގައި ތިބެނީ ޖުމްލަ 120 މެންބަރުންނެވެ. އެހެންވީމާ އަޣުލަބިއްޔަތަކީ 61 ގޮނޑިއެވެ. ނުވަތަ އެއަށްވުރެ މަދުނޫން އަދަދެއްގެ ގޮނޑިއެވެ. މިހާރު ފެންނަ ގޮތުން ނަތަންޔާހޫއާއި އޭނާގެ ބައިވެރިންނަށް ފަންސާސް ގޮނޑިވެސް ނުނެގޭނެއެވެ. ނަތަންޔާހޫގެ ވެރިކަން ނިމުމަކަށް ގެނައުމަށްޓަކައި އިދިކޮޅު ހުރިހާ ލީޑަރުން ހިމެނޭހެން މިހާރުވަނީ ކޯލިޝަނެެއްވެސް ހަދައިފައެވެ.

ެިއިދިކޮޅު ލީޑަރުންގެ ތެރެއިން ޔައިރު ލަޕިޑް،ގާޑީ އެއިޒެންކޮޓް، ޔައިރު ގޮލާން، ނަފްތަލީ ބެނެޓް އަދި އަވިގްޑޯ ލީބަމަން ހިމެނެނީ މި ކޯލިޝަނުގައެވެ. މީގެތެރޭގައި އިޒްރޭލުގެ ބޮޑުވަޒީރުކަން ކުރިން ކޮށްފައިވާ ބައެއް މީހުން ހިމެނެއެވެ. އަދި ގާޒާގެ ހަގުރާމަ ފެށުނު ފަހުން ނަތަންޔާހޫގެ ހަގުރާމައިގެ ކެބިނެޓުގައި ހިމެނުނު ބައެއް މީހުންވެސް އެބަތިއްބެވެ. މިއެންމެންގެ އަމާޒަކީ ނަތަންޔާހޫގެ ވެރިކަން ނިމުމަކަށް ގެނައުމެވެ. އެންމެންވެސް އޭނާއާ ދެކޮޅަށް މަސައްކަތް ކުރުމެވެ. އިދިކޮޅު އެއްވެސް ލީޑަރަކު އެކަކު އަނެކަކާ ދިމާނުކުރުމެވެ. ނަތަންޔާހޫ ބޭރުކުރުމަށް އެންމެންގެ ހަކަތަޔާއި ވަސީލަތްތައް ބޭނުން ކުރުމެވެ. ނަތަންޔާހޫއާ ދެކޮޅު އެންމެ ބޮޑު ކެމްޕޭނަކީ އަދި ރައްޔިތުންގެ ތެރޭގައި އެންމެ ބޮޑަށް ވިކެމުންދާ ކެމްޕޭނަކީ އޮކްޓޫބަރު ހަތެއްގެ ހަމަލާގެ މައުލޫމާތު ދުރާލައި ލިބިގެންހުރެމެ އެ ހަމަލާ ހުއްޓުވުމަށް ނަތަންޔާހޫވެސް އަދި އޭނާގެ ސަރުކާރުންވެސް އެއްވެސް މަސައްކަތެއް ނުކުރުމުގެ ތުހުމަތެވެ.

އޮކްޓޫބަރު ހަތެއްގެ ހަމަލާޔަކީ އިޒްރޭލުގެ ތާރީޚުގައިވެސް އެންމެ ބޮޑު ނާކާމިޔާބީއެވެ. އެންމެ ބޮޑު ލަދެވެ. މި ހަމަލަޔަކީ 2023 ވަނަ އަހަރުގެ އޮކްޓޫބަރު ހަތްވަނަ ދުވަހު ފަލަސްތީނުގެ ހަމާސް ޖަމާއަތުގެ ކޮމާންޑޯއިން އިޒްރޭލުގެ ތެރެއަށްވަދެ ދެތިން ގަޑިއިރަށް އިޒްރޭލު ކުޑަކަކޫ މައްޗަށް ތިރިކޮށްފައި ބޭއްވި ހަމަލައެވެ. އޮޕަރޭޝަނެވެ. އޭރުވެސް ބޮޑުވަޒީރަކީ ބެންޖަމިން ނަތަންޔާހޫއެވެ. މިހާރު ހާމަވެފައިވާ މައުލޫމާތު ތަކުން އެނގޭގޮތުގައި އެޒާތުގެ ހަމަލައެއް ހަމާސްއިން ރާވަމުންދާ ކަމުގެ މައުލޫމާތު ލިބިގެން އަރަބި ދެ ގައުމަކުން ނަތަންޔާހޫއަށް ގުޅައި އެ ހުރިހާ މައުލޫމާތެއް ހިއްސާކޮށްފައިވެއެވެ. އެދެގައުމަކީ މިސްރާއި ޔުނައިޓެޑް އަރަބް އެމިރޭޓްސްއެވެ. އިޒްރޭލުގެ ޖާސޫސީ އިދާރާއަށް ނޭގުނު އެއްޗެއް ކަލޭމެންނަށް އެނގޭނީ ވަކި ކޮންގޮތަކުންހޭ ބުނެފައި ނަތަންޔާހޫ އެއްވެސް ފިޔަވަޅެއް ނާޅައެވެ. އަދި އިޒްރޭލުގެ ކަމާގުޅުންހުރި މުއައްސަސާތަކަށްވެސް އެ މައުލޫމާތު ހިއްސާއެއް ނުކުރެެއެވެ. މި މައުލޫމާތު އިޒްރޭލަށް ދޭން މިސްރުގެ ޖާސޫސީ އިދާރާގެ ވެރިޔާވެސް އިޒްރޭލަށް ދިޔަކަން މިހާރުވަނީ ހާމަވެފައެވެ.

ކޮންމެއަކަސް ނަތަންޔާހޫއަކީ މަގާމަށް ކުފޫހަމަނުވާ މީހެއްކަން ރައްޔިތުންނަށް ބުނެދީ ވިސްނައިދޭން އިދިކޮޅު ފަރާތްތަކުން އެންމެ ގަދަޔަށް ދައްކަމުންދަނީ މިވާހަކައެވެ. އެންމެ ގިނަބަޔަކު ގަބޫލު ކުރަނީވެސް މިވާހަކައެވެ. ޚިޔާލު އެއްކުރުމުގެ ވޯޓުތަކާއި ސާރވޭތަކުން އަދި ކޮންމެ އެއްޗެއް ދެއްކިޔަސް ފަހަރުގައި ނަތަންޔާހޫ އެންމެ ފަހު ވަގުތު ކޮންމެވެސް ދޮރެއް ހުޅުވައިގެން އެތެރެއަށް ދެމިގަތުމުގެ ފުރުސަތު އެބައޮވެއެވެ. އިޒްރޭލުގެ ތާރީޚުގައިވެސް އެންމެ ގިނަ ދުވަހު ވެރިކަން ކުރުމުގެ ރިކޯޑު އޭނާ ހޯދާފައިވަނީ ދޮގާއި މަކަރާއި ހީލަތް ހަދައިގެންނެވެ. މިދެންނެވި ކަންކަމުގައި އޭނާއަށްވުރެ ވަކި ކުޅަދާނަ އެހެން ލީޑަރަކު ނެތެވެ. ނަތަންޔާހޫގެ ވެރިކަން ނިމޭނީ އިދިކޮޅު ޕާޓީއަކަށް ނުވަތަ އިދިކޮޅު ޕާޓީތައް ހިމެނޭ ކޯލިޝަނަށް ގާނޫނުހަދާ މަޖިލީހުގެ އަޣުލަބިއްޔަތު ލިބިގެންނެވެ. މިދެންނެވި ގޮތަށް އަޣުލަބިއްޔަތު ނުލިބޭނަމަ ކުދިކުދި ޕާޓީތަކާއި މިނިވަން މެންބަރުންނަށް ބޮޑެތި މަގާމުތަކާއި ފައިސާ ހުށައަޅައިގެން ނަތަންޔާހޫގެ ކޮޅަށް 61 މެންބަރުން ހަމަކޮށްފާނެއެވެ. މީގެކުރީގެ ބައެއް ފަހަރުތަކުގައިވެސް މިކަން އޭނާވަނީ ކޮށްފައެވެ.

އިޒްރޭލުގައި އޮންނަނީ ބަރުލަމާނީ ނިޒާމެވެ. ސަރުކާރު އަންނަނީ ގާނޫނުހަދާ މަޖިލީހުގެ ތެރެއިންނެވެ. ރައީސަކީ ރަމްޒީ މީހެކެވެ. ސަރުކާރު ހިންގުމުގެ ހުރިހާ ބާރެެއް އޮންނަނީ ބޮޑުވަޒީރަށެވެ. ބޮޑުވަޒީރަކީ އާއްމު ގޮތެެއްގައި މަޖިލީހުގެ އަޣުލަބިއްޔަތު އޮންނަ ޕާޓީއެއްގެ ލީޑަރެވެ. ނުވަތަ އިތުބާރުއޮތް ކަމުގެ ވޯޓު ކާމިޔާބުކުރެވޭ މިންވަރަށް މަޖިލީހުގެ ކޮންޓްރޯލް އޮންނަ މީހެކެވެ. އިންތިޚާބަށްފަހު ރައީސަށް އޮންނަނީ މަޖިލީހުގެ އެންމެބޮޑު ޕާޓީގެ ލީޑަރަށް ސަރުކާރެއް އެކުލަވައިލުމުގެ ދައުވަތު ދިނުމެވެ. އެގޮތަށް ދައުވަތު ލިބޭ މީހަކު 28 ދުވަހުގެ ތެރޭގައި ސަރުކާރެެއް އެކުލަވާލައި ހުށައަޅަން ޖެހެއެވެ. އެ މުއްދަތުގެ ތެރޭގައި ނުކުރެވިއްޖެނަމަ އިތުރު ސާދަ ދުވަސްވެސް ލިބެއެވެ. އެ މުއްދަތުގެ ތެރޭގައިވެސް ސަރުކާރެއް އެކުލަވައި ނުލެވިއްޖެނަމަ އަނެެއްކާވެސް މުއްދަތު އިތުރު ކުރެވޭނެ ގޮތްތަކެއް ހުރެއެވެ. މިހުރިހާ މަރުހަލާއެއްގައި ހިމެނެނީ ގިނަވެގެން ސަތޭކަ ދުވަހެވެ. އެވަރުންވެސް ސަރުކާރެެއް އެކުލަވައި ނުލެވިއްޖެނަމަ ދެންޖެހޭނީ އަނެއްކާވެސް އައު އިންތިޚާބެއް ބޭއްވުމަށެވެ.

ބަރުލަމާނީ ނިޒާމު އޮންނަ ގައުމުތަކުގައި ނުކުރާ ތަޖުރިބާއެއްވެސް އިޒްރޭލުން ވަނީ ކޮށްފަައެވެ. ބަރުލަމާނީ ގައުމުތަކުގައި ބޮޑުވަޒީރަކީ ރައްޔިތުންގެ ސީދާ ވޯޓަކުން ހޮވާ މީހެއް ނޫނެވެ. މަޖިލީހުގެ ތެރެއިން އަންނަ މީހެކެވެ. އެކަމަކު ގާނޫނުއަސާސީއަށް ގެނައި އިސްލާހަކާއެކު 1996 ވަނަ އަހަރުން ފެށިގެން 2001 ވަނަ އަހަރާ ހަމަޔަށް އިޒްރޭލުގައި ބޮޑުވަޒީރަކު ހޮވާފައިވަނީ ރައްޔިތުންގެ ސީދާ ވޯޓަކުންނެވެ. އެއީ ރަގަޅު ތަޖުރިބާއަކަށްނުވެ މަޖިލީހުގެ ބާރު ހަނިވާކަމަށް ފެނިގެން އަނެއްކާވެސް ކުރީގެ ނިޒާމަށް 2003 ވަނަ އަހަރުން ފެށިގެން ވަނީ ރުޖޫއަވެފައެވެ. މިހެން މިކަން ބަދަލުކުރީމާ އައިބަދަލަކީ ކުދިކުދި ހަރުކަށި ޕާޓީތަކުގެ ނުފޫޒާއި ބާރުގަދަވުމެވެ. ބޮޑުވަޒީރަކަށްވާން ބޭނުންވާ މީހަކަށް އޮންނަނީ ކުދިކުދި ޕާޓީތަކުން ބޭނުންވާހައި ކަމަކަށް ދީލާލައި އެމީހުން ހަފޮޅުން އެތެރެކުރުމެވެ. އިޒްރޭލުގެ މިހާރުގެ ހައްދުފަހަނަޅާފައިވާ ގައުމީ ސަލާމަތާބެހޭ ވަޒީރާއި މާލީވަޒީރަކީ މިދެންނެވި ގޮތްގޮތުން އަސްވިއްކައި ލަގަން ވިއްކައިގެން މަގާމުތަކަށް އަރައިތިބި މީހުންނެވެ.