އީރާނުގެ ވަށައިގެންވާ ސަރަހައްދުތަކަށް އެމެރިކާގެ އަސްކަރީ މަނަވަރުތަކާއި ސިފައިން ފޮނުވަން ފަށާފައިވާ ކަމަށް، އެމެރިކާގެ އޮފިޝަލަކާ ހަވާލާދީ އަލްޖަޒީރާއިން ރިޕޯޓުކޮށްފިއެވެ.

އަލްޖަޒީރާއަށް މައުލޫމާތު ދިން އޮފިޝަލު ވިދާޅުވި ގޮތުގައި، އެމެރިކާގެ ތިން އެއާކްރާފްޓް ކެރިއަރާއި ދެ ލޭންޑިންގ ގްރޫޕް އަންނަ ނޮވެންބަރު މަހުގެ ނިޔަލަށް އީރާނުގެ ވަށައިގެންވާ ސަރަހައްދުތަކަށް ޖަމާކުރާނެއެވެ. މިގޮތުން، އެމެރިކާގެ ސެން ޑިއޭގޯގެ އަސްކަރީ މަރުކަޒުން 'ޔޫއެސްއެސް ތިއޮޑޯ ރޫޒަވެލްޓް' އެއާކްރާފްޓް ކެރިއަރުގެ ސްޓްރައިކް ގްރޫޕް މިހާރު ވަނީ މެދުއިރުމައްޗަށް މިސްރާބު ޖަހާފައެވެ.

މީގެ އިތުރުން، 2،000 އަށް ވުރެ ގިނަ މެރިން ސިފައިންނާއެކު 'މޭކިން އައިލެންޑް މެރިން އެކްސްޕެޑިޝަނަރީ ފޯސް' ވެސް ހޯމަ ދުވަހު ސެން ޑިއޭގޯއިން ފުރާފައިވާ ކަމަށް އޮފިޝަލް ވިދާޅުވިއެވެ.

މިއީ އީރާނާ ދެކޮޅަށް އެމެރިކާއިން ކުރިއަށްގެންދާ އަސްކަރީ ހަރަކާތްތައް އިތުރަށް ވަރުގަދަކުރުމުގެ ގޮތުން ފޮނުވާ ފައުޖުތަކެއް ކަމަށް އަލްޖަޒީރާއިން ރިޕޯޓުކޮށްފައިވެއެވެ.

އޮފިޝަލު ފާހަގަކުރެއްވި ގޮތުގައި، މެދުއިރުމައްޗަށް މި ޖަމާކުރާ ބޮޑު އަސްކަރީ ބާރުގެ ސަބަބުން އީރާނާ މެދު އަމަލުކުރާނެ ގޮތްތަކެއް ނިންމުމުގައި އެމެރިކާގެ ލީޑަރުންނަށް ގިނަ އިހުތިޔާރުތަކެއް ލިބޭނެއެވެ. މި މައުލޫމާތު ހާމަކޮށްފައިވަނީ، އެމެރިކާއާއި އީރާނާ ދެމެދު ހިނގަމުންދާ ހަމަލާބަދަލުކުރުންތަކުގެ ތެރެއިން، އެމެރިކާގެ އަސްކަރީ ޕްލޭންތަކާ ގުޅޭގޮތުން އަލްޖަޒީރާއަށް ދިން ހާއްސަ މައުލޫމާތުތަކެއްގައެވެ.