މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫއު ނިމޭއިރު އާ ޕޯޓު ހަތަރު ގުނަ ބޮޑުވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަސައްކަތް ކުރިއަށްދާ ގޮތް ބައްލަވައިލެއްވުމަށްޓަކައި ތިލަފުއްޓަށް މިއަދު ކުރެއްވި ޒިޔާރަތުގައި ނޫސްވެރިންނަށް މައުލޫމާތުދެއްވަމުން ރައީސް ވިދާޅުވީ، ތިލަފުއްޓަށް ޕޯޓު ބަދަލުކުރުމުގެ މަސައްކަތަކީ މި ސަރުކާރުން އެންމެ އިސްކަމެއް ދީގެން ކުރިއަށްގެންދާ މަޝްރޫއު ކަމަށެވެ.

ރައީސް ވިދާޅުވި ގޮތުގައި، މާލޭގައި މިހާރު އޮތް ވިޔަފާރި ބަނދަރަކީ ރާއްޖޭގެ އިގުތިސާދު ކުރިއަށް ގެންދިއުމަށް ބޭނުންވާ މިންވަރަށް، ކުރު މުއްދަތެއްގެ ތެރޭގައި ހިދުމަތް ދިނުމަށް އެކަށީގެންވާ ތަނެއް ނޫނެވެ. އެހެންކަމުން، އޭގެ ބަދަލުގައި ތިލަފުށީގައި ޕޯޓު ބޮޑުކޮށް، ޒަމާނީ ފެންވަރަށް ތަރައްގީކުރުމުގެ މަސައްކަތް ފަށައިގެން ކުރިއަށްދާ ކަމަށް އެ މަނިކުފާނު ފާހަގަކުރެއްވިއެވެ. އަދި ސައުތު ވެސްޓް ހާބަރުގައި ވެސް މި މަޝްރޫއުގެ ބައެއް މަސައްކަތް ހިމެނޭ ކަމަށް ވިދާޅުވިއެވެ.

މި މަޝްރޫއުގެ ފުރަތަމަ ފިޔަވަހި އަންނަ އަހަރުގެ ނޮވެމްބަރު 11 އަށް ނިންމައި ހުޅުވާނެ ކަމަށް ރައީސް ވިދާޅުވިއެވެ. އެ މަނިކުފާނު ވިދާޅުވީ "މި ނިމޭ މަސައްކަތްތައް ނިމޭއިރުގައި، މާލޭގައި މިހާރު މިއޮތް ޕޯޓަށްވުރެ ހަތަރުގުނަ، އިރާދަކުރެއްވިޔާ، ބޮޑުވާނެ" ކަމަށެވެ. އަދި ސައިޒުގެ ގޮތުންނާއި ކެޕޭސިޓީގެ ގޮތުންވެސް އާ ޕޯޓު ބޮޑުވާނެކަން ފާހަގަކުރައްވައި، އޭގެ ނަތީޖާއެއްގެ ގޮތުން "ވިޔަފާރީގެ ދާއިރާއަށް، ޖުމްލަކޮށް ރާއްޖޭގެ އިގުތިސާދަށް، އިރާދަކުރެއްވިއްޔާ، ވަރަށް ބޮޑު ދޮރެއް ހުޅުވިގެންމިދަނީ،" ކަމަށް ރައީސް ވިދާޅުވިއެވެ.

ރާއްޖޭގެ އިގުތިސާދު ފުޅާކުރުމަށާއި އުފެއްދުންތެރިކަން މައްޗަށް ގެންދިއުމަށް މިއީ އެންމެ މުހިންމު މަޝްރޫއުކަން ފާހަގަކުރައްވައި، ސަރުކާރުގެ ކަމާބެހޭ ފަރާތްތަކާއި ބޭރުގެ އެހީތެރިންނާ ގުޅިގެން މި މަސައްކަތް ވަރަށް ކާމިޔާބުކަމާއެކު ކުރިއަށްދާ ކަމަށް ރައީސް ވިދާޅުވިއެވެ.

މި މަސައްކަތުގައި ރޭގަނޑާއި ދުވާލު ބުރަކޮށް އުޅުއްވާ މިނިސްޓްރީތަކާއި ކުންފުނިތަކުގެ ވެރިންނާއި މުވައްޒަފުންނަށް އެ މަނިކުފާނު ޝުކުރު އަދާކުރެއްވިއެވެ. އަދި މަސައްކަތް ކުރިއަށްދާ ގޮތް ފެނިވަޑައިގަތުމުން ވަރަށް ބޮޑަށް ހިތްހަމަޖެހިވަޑައިގެންނެވި ކަމަށް ވިދާޅުވެ، އެ ބޭފުޅުން ކުރައްވާ ދަމަހައްޓަނިވި މަސައްކަތްޕުޅުތަކަށް ރައީސް ވަނީ ތައުރީފުކުރައްވައިފައެވެ.

ރައީސް ތިލަފުއްޓަށް ވަޑައިގަތުމުން މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމަށް އެމްޕީއެލްގެ ފަރާތުން ތިލަފުށީގައި ކުރަމުންގެންދާ މަސައްކަތުގެ އަދާހަމަ މައުލޫމާތު އެ ކުންފުނީގެ ފަރާތުން ރައީސްއާ ހިއްސާކުރެއްވިއެވެ. މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމަކީ ސަރުކާރުން ހާއްސަ އިސްކަމެއްދީގެން ކުރަމުންގެންދާ މަސައްކަތެކެވެ.

ތިލަފުއްޓަށް މާލޭ ވިޔަފާރި ބަނދަރު ބަދަލުކުރުމުގެ މަސައްކަތުގައި، އެތެރޭގެ އުޅަނދުފަހަރަށް ހާއްސަ ކީ-ވޯލްގެ ފުރަތަމަ 100 މީޓަރުގެ މަސައްކަތް މިހާރު ވަނީ ނިމިފައެވެ. ބިންގަނޑު އެއްވަރުކޮށް މަގުތައް ހެދުމުގެ މަސައްކަތްތައް ކުރިއަށްދާ އިރު، އެތެރޭގެ ކީ-ވޯލްގެ ހިއްކި ސަރަހައްދު ބެކްފިލް ކުރުމުގެ ގާތްގަނޑަކަށް 40 އިންސައްތަ މަސައްކަތް ވަނީ ނިމިފައެވެ. އަދި ކީ-ވޯލަށް ބޭނުންވާ ޕްރީކާސްޓް ކޮންކްރީޓް ބްލޮކްތައް ސައިޓުގައި އުފެއްދުމުގެ މަސައްކަތާއި، ބޭނުންވާ މެޝިނަރީއާއި ވަސީލަތްތައް ހޯދުމުގެ އިތުރުން ޓާމިނަލް އިމާރާތްތައް އަޅާނެ ކޮންޓްރެކްޓަރަކު ހޮވުމުގެ މަސައްކަތް މިހާރު ދަނީ ކުރިއަށެވެ.

ސަރުކާރުން މައުލޫމާތުދޭ ގޮތުގައި ތިލަފުށީގައި ގާއިމުކުރެވޭ 60 ހެކްޓަރުގެ ޖާގައިގެ މި ބަނދަރު ހުޅުވޭއިރު އަހަރަކު 390،000 ޓީއީޔޫ ކެޕޭސިޓީގައި ކޮންޓެއިނަރު ގެންގުޅުމުގެ ޖާގަ ހެދޭނެއެވެ. އަދި މުޅި މަޝްރޫއު ނިމިގެންދާއިރު މި އަދަދު އަހަރަކު 1.8 މިލިއަން ޓީއީޔޫ އަށް ކޮންޓެއިނަރުގެ ކެޕޭސިޓީ އިތުރުކުރެވޭނެއެވެ. ބަނދަރު ހުޅުވާނީ ފުން މިނުގައި 14.6 މީޓަރު ހުންނަ ބައިނަލްއަގުވާމީ ކޮންޓޭނަރު ބޯޓުފަހަރަށް ހާއްސަ 375 މީޓަރު ދިގު ކީ-ވޯލަކާއެކުގައެވެ. މި ކީ-ވޯލް 1.4 ކިލޯމީޓަރަށް ދިގުކުރުމުގެ ޖާގަ އޮންނާނެ ކަމަށް ސަރުކާރުން މައުލޫމާތުދެއެވެ.

މީގެ އިތުރުން މި ބަނދަރުގައި ޑޮމެސްޓިކް އުޅަނދުފަހަރަށް ހާއްސަ ގާތްގަނޑަކަށް ދެ ކިލޯމީޓަރަށް ވުރެ ދިގު ކީ-ވޯލެއް ހެދޭނެއެވެ. އަދި މި ބަނދަރުގައި ގާއިމުކުރެވޭ ބައިނަލްއަގުވާމީ ކޮންޓޭނަރު ބޯޓުފަހަރަށް ހާއްސަ 375 މީޓަރު ދިގު ކީ-ވޯލް ހެދުމާއެކު، މުދާ ބަރުކޮށް ބާލައި ހެދުން ގާތްގަނޑަކަށް ދެ ދުވަހުގެ ޓާން އަރައުންޑް ޓައިމްއަކަށް ކުރުކުރެވޭނެ ކަމަށް އަންދާޒާކުރެވެއެވެ. މާލޭ ވިޔަފާރި ބަނދަރުގައި އުޅަނދުފަހަރުން މުދާ ބަރުކޮށް ބާލައި ހެދުމުގެ މި ހިދުމަތް ދިނުމަށް މިހާރު ހަތް ދުވަހާއި 14 ދުވަހާ ދެމެދުގެ މުއްދަތެއް ހޭދަވެއެވެ. ބަނދަރު ހުޅުވޭއިރު ޝިޕް-ޓު-ޝޯ 2 ކީ ކެރޭނާއި 1 މޮބައިލް ހާބާ ކެރޭނު ގާއިމުކުރެވޭނެއެވެ.