އިންޑިއާގެ މަޝްހޫރު ޓޯކް ޝޯ 'ކޮފީ ވިތު ކަރަން'ގެ 9 ވަނަ ސީޒަނަކީ އެ ޝޯގެ އެންމެ ފަހު ސީޒަން ކަމަށް، ޝޯ ހުށަހަޅައިދޭ ކަރަން ޖޯހަރް ކަށަވަރުކޮށްދީފިއެވެ.

އިންސްޓަގްރާމްގައި އާންމުކުރި ވީޑިއޯއެއްގައި ކަރަން ބުނީ، މިއީ ރަސްމީ އިއުލާނަކަށް ވުރެ ބޮޑަށް އޭނާގެ ޖަޒުބާތުތަކާ ގުޅިފައިވާ ނިންމުމެއް ކަމަށެވެ. 2004 ވަނަ އަހަރު ޝޯ ފެށުމުގެ ކުރިން އޭނާގެ ބައްޕަ ޔަޝް ޖޯހަރްއާ އެކު ކުރެވުނު މަޝްވަރާތަކުގެ ހަނދާންތައް އާކުރަމުން ކަރަން ބުނީ، ހުރިހާ ރަނގަޅު ކަމަކަށް ވެސް ނިމުމެއް އަންނާނެކަން ގަބޫލުކުރަން ޖެހޭ ކަމަށެވެ.

މީގެ އިތުރުން، ނޫސްވެރިންނަށް ނެރުނު ބަޔާނެއްގައި ކަރަން ފާހަގަކުރި ގޮތުގައި، މި ޝޯއަކީ އޭނާގެ ހަޔާތުގެ ވަރަށް މުހިންމު ބައެކެވެ. އަދި ޝޯގެ ސަބަބުން ގިނަ ރަހުމަތްތެރިންނާއި، ހަނދާންތަކާއި، ލޯބީގެ އިތުރުން ގިނަ މައްސަލަތަކާ ވެސް ކުރިމަތިލާން ޖެހުނު ކަމަށް އޭނާ ބުންޏެވެ. ނަމަވެސް މި ހުރިހާ ކަމެއްގެ ތެރެއިން ވެސް ބެލުންތެރިންގެ ފަރާތުން ލިބުނު ތަރުހީބު އޭނާ ފާހަގަކުރިއެވެ.

މި ޝޯގެ 9 ވަނަ ސީޒަން ދައްކަން ފަށާނީ މި މަހުގެ 14 ގައި ޖިއޯހޮޓްސްޓާ އިންނެވެ. 2004 ވަނަ އަހަރު ފެށި މި ޝޯއަށް 22 އަހަރު ވެފައިވާއިރު، މިހާތަނަށް 8 ސީޒަނެއްގެ 161 އެޕިސޯޑު ވަނީ ގެނެސްދީފައެވެ.

ފަހު ސީޒަނުގައި ބައިވެރިވާނެ ތަރިންނާ ގުޅޭގޮތުން މީޑިއާތަކުގައި އެކި ނަންތައް ދަނީ ދައުރުވަމުންނެވެ. އޭގެ ތެރޭގައި އާމިރް ހާން، ސައިފް އަލީ ހާން، ޝާހްރުކް ހާން އަދި ކަރީނާ ކަޕޫރު ފަދަ ތަރިން ހިމެނޭ ކަމަށް އިންޑިއާގެ މީޑިއާތަކުން ރިޕޯޓުކޮށްފައިވެއެވެ. ނަމަވެސް ޝޯގެ ޕްރޮޑަކްޝަން ޓީމުން އަދި ރަސްމީކޮށް އެއްވެސް ނަމެއް ހާމަކޮށްފައެއް ނުވެއެވެ.