އެމެރިކާގެ އަސްކަރިއްޔާއިން އީރާނުގެ ކަނޑުގެ ސިފައިންނާއި ވައިގެ ސިފައިން ހިމެނޭ ގޮތަށް އެ ގައުމުގެ އަސްކަރީ ގާބިލުކަން ނައްތާލާފައިވާ ކަމަށް އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ވިދާޅުވެއްޖެއެވެ.

އޭނާ މިހެން ވިދާޅުވީ ވޮޝިންޓަން ޑީސީއާ ކައިރީގައި އޮންނަ ކުއަންޓިކޯ މެރިން ބޭސްގައި އަސްކަރީ އިސްވެރިންނާ މުހާތަބުކުރައްވައި ދެއްވި ތަގުރީރެއްގައެވެ.

“ސްޓޭޓް އޮފް ދަ ފޯސް” ގެ ނަމުގައި ދެއްވި މި ތަގުރީރުގައި ހެގްސެތު ވިދާޅުވި ގޮތުގައި، އެމެރިކާގެ ސިފައިން ވަނީ އީރާނުގެ ކަނޑުގެ ސިފައިންނާއި، ވައިގެ ސިފައިންނާއި، ދިފާއީ ނިޒާމުތަކުގެ އިތުރުން އެ ގައުމުގެ އިސްވެރިންނާއި އަސްކަރީ ސިނާއީ ގާބިލުކަން ވެސް ނައްތާލާފައެވެ. އަދި އީރާނުގެ މުޅި ދިފާއީ ނިޒާމު ފުނޑުފުނޑުކޮށްލާފައިވާ ކަމަށް ވެސް އޭނާ ވިދާޅުވިއެވެ.

މީގެ އިތުރުން، އީރާނުން ނިއުކްލިއަރ ހަތިޔާރު ހޯދުމަށް ކުރަމުންދިޔަ އުންމީދުތައް ވެސް ނާކާމިޔާބުކޮށްލާފައިވާ ކަމަށް ހެގްސެތު ވިދާޅުވިއެވެ. އޭނާ ވިދާޅުވި ގޮތުގައި އީރާނުގެ ނިއުކްލިއަރ އުންމީދުތައް ހުއްޓުވައި، އެކަން ވަނީ މުޅި ދުނިޔެއަށް ހާމަކޮށްދީފައެވެ.

މި ހުރިހާ ކަމެއް ހާސިލުކޮށްފައިވަނީ އެމެރިކާގެ ސިފައިން ކަމަށް ފާހަގަކުރައްވައި، ހެގްސެތު ވަނީ ސިފައިންނަށް ތާރީފުކުރައްވާފައެވެ. އީރާނުގެ އަސްކަރީ މުދާތަކާއި އިސްވެރިން ނައްތާލުމާ ގުޅޭގޮތުން ހެގްސެތު މި ދައުވާތައް ކުރެއްވީ، އެމެރިކާގެ އަސްކަރިއްޔާއަށް ގެންނަ ބަދަލުތަކާ ގުޅޭގޮތުން މައުލޫމާތު ދެއްވުމަށް ބޭއްވި ބައްދަލުވުމުގައެވެ.