ރ. މަޑުއްވަރީގައި ބިދޭސީ އަންހެނަކަށް އަނިޔާކޮށް، އޭނާގެ އަތުން ފޭރެން އުޅުނު މައްސަލައިގައި މީހަކު ހައްޔަރުކޮށްފިއެވެ.

މިދިޔަ ހުކުރު ދުވަހު ސޯޝަލް މީޑިއާގައި އާންމުވި ވީޑިއޯއަކުން ފެންނަނީ، ބިދޭސީ ފިރިހެނަކު އެ އަންހެން މީހާގެ އަނގަމަތީގައި އަތް އަޅައިގެން، އެ އަންހެން މީހާގެ ގައިމައްޗަށް އަރާ އިންނަަ މަންޒަރެވެ. އެމީހާ ހުއްޓުވީ އެވަގުތު އެ މަންޒަރު ވީޑިއޯ ކުރި ދިވެހި ފިރިހެނެކެވެ.

ފުލުހުން މިއަދު ބުނީ މި މައްސަލައާ ގުޅިގެން ހޮނިހިރު ދުވަހު ކޯޓު އަމުރެއްގެ ދަށުން 24 އަހަރުގެ ނޭޕާލް ފިރިހެނަކު ހައްޔަރުކޮށްފައިވާ ކަމަށެވެ. މައްސަލައާ ގުޅިގެން އޭނާގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން ފަސް ދުވަހަށް ބަންދުކުރުމަށް އަމުރުކޮށްފައިވާ ކަމަށެވެ.

މި މައްސަލަ ފުލުހުން ދަނީ ތަހުގީގުކުރަމުންނެވެ.

އެ ވީޑިއޯގައި އެ އަންހެން މީހާގެ ފައިސާތައް ކަމަށް ބެލެވޭ ގިނަ އަދަދެއްގެ ފައިސާ މަގުމައްޗަށް އުކާލާފައި ހުރި މަންޒަރު ވެސް ފެނެއެވެ. އަދި ފަހުން އެ އަންހެން މީހާ ފައިސާތައް ހޮވާ މަންޒަރުތައް ވެސް ފެނެއެވެ.

އެނގިފައިވާ ގޮތުގައި އެ އަންހެން މީހާއަކީ މަޑުއްވަރީ ކެފޭއެއްގައި މަސައްކަތް ނޭޕާލް އަންހެނެކެވެ. އަދި އެ ފިރިހެން މީހާއަކީ ގަވާއިދާ ހިލާފަށް އެރަށުގައި އުޅެމުންދާ މީހެއްކަން ވެސް އެނގިފައިވެއެވެ.