ފެނަކަ ކޯޕަރޭޝަން އުވާލައި، ސްޓެލްކޯއާ އެއްކޮށްލަން ސަރުކާރުން ނިންމައިފިއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސް ޑރ. މުހައްމަދު މުއިއްޒު ވިދާޅުވީ ފެނަކައާ ބެހޭގޮތުން ވަރަށް ގިނަ ކަންކަން އަޑުއިވޭނެ ކަމަށާއި މިދިޔަ ސަރުކާރުން ފެނަކަ، ނާޖާއިޒް ގޮތުގައި ބޭނުންކޮށްފައިވާކަން އޮޑިޓާ ޖެނެރަލްގެ ރިޕޯޓުން ފެންނަން އޮންނަ ކަމަށެވެ.

ފެނަކަ ރަނގަޅުކޮށް ހިންގުމަށްޓަކައި މަސައްކަތްތަކެއް ކުރެވިފައިވާ ކަމަށާއި ނަމަވެސް އެކަމަކީ ދެމެހެއްޓެނިވި ގޮތެއްގައި ރަނގަޅު ކުރެވޭނެ ކަމެއްގެ ގޮތުގައި ފަންނީ ބޭފުޅުން ވިދާޅުވާ ގޮތުން ކުރެވޭނެ ކަމަކަށް ނުވާ ކަމަށް އެމަނިކުފާނު ވިދާޅުވިއެވެ.

"އެހެންވީމަ، ސަރުކާރުން މިކަމާ ބެހޭގޮތުން ވަރަށް ފުންކޮށް ވިސްނައި މަޝްވަރާކުރުމަށްފަހު، މިހާރު ނިންމާފައި މިވަނީ ކުރިންވެސް އަޅުގަނޑުމެން ނިންމިން ނިންމުމެއް. އެކަމު އެކަމުގަވެސް އެ ޕްރެކްޓިކަލީ ކުރިއަށް ގެންދިއުމުގައި ދަތިތައް ދިމާވި. އެހެންނަމަވެސް މިހާރު އަޅުގަނޑުމެން ނިންމާފައި މިވަނީ ފެނަކަ އުވާލުމަށްފަހު ސްޓެލްކޯއާ އެއްކޮށްލަން،" އެމަނިކުފާނު ވިދާޅުވިއެވެ.

ރައީސް ވިދާޅުވީ އެހެންކަމުން އެ ޕްރޮސެސް ނިމުމުން މުޅި ރާއްޖޭގައި ދެން ހިދުމަތް ދޭނީ ސްޓެލްކޯއިން ކަމަށާއި ފެނަކައިން ކުރަމުންދާ ހުރިހާ މަސައްކަތެއް އެއްކޮށް ސްޓެލްކޯއަށް ބަދަލުކުރެވި، ފެނަކަ އެއްކޮށް އުވާލެވިގެން ދާނެ ކަމަށެވެ.

އޭގެ އިތުރުން އެމްޑަބްލިޔުއެސްސީގެ 100 ޕަސަންޓު ހިއްސާ އާއި ދިރާގުގެ 51 ޕަސަންޓުގެ ހިއްސާ ސަރުކާރަށް ގަނެ، ބައެއް އެހެން ކުންފުނިތައް ވެސް އެއްކޮށްލަން ނިންމަވާފައިވާކަން ވެސް ރައީސް އިއުލާންކުރެއްވިއެވެ.