ބޮލީވުޑްގެ މަޝްހޫރު ތަރި ކިއާރާ އަދްވާނީ އޭނާގެ ފުރަތަމަ ދަރިފުޅު ސަރާޔާ އުފަންވުމަށްފަހު ކުރިމަތިވި ޕޯސްޓްޕާޓަމް ނުވަތަ ވިހެއުމަށްފަހު އަންނަ ނަފްސާނީ އަދި ޖިސްމާނީ ބަދަލުތަކާ ގުޅޭގޮތުން ފުރަތަމަ ފަހަރަށް އާންމުކޮށް ވާހަކަދައްކައިފިއެވެ. ރާޖް ޝަމާނީގެ ޕޮޑްކާސްޓްގައި ވާހަކަދައްކަމުން ކިއާރާ ވަނީ މައިވަންތަކަމާއެކު އޭނާގެ ދިރިއުޅުމަށާއި އަމިއްލަ ނަފްސަށް އައި ބޮޑެތި ބަދަލުތައް ހިއްސާކޮށްފައެވެ.

މިދިޔަ އަހަރުގެ ޖުލައި މަހު ކިއާރާ އާއި ފިރިމީހާ ސިދާތު މަލޯތުރާއަށް އަންހެން ދަރިފުޅަކު ލިބުމަށްފަހު ކުރިމަތިވި ކަންކަމާ ގުޅޭގޮތުން ވާހަކަދައްކަމުން ކިއާރާ ބުނީ، ވިހެއުމަށްފަހު އަންނަ ބަދަލުތަކާ ގުޅޭގޮތުން މީހުން ވާހަކަ ނުދައްކާ ކަމަށާއި، އެއީ އިތުރަށް ވާހަކަދެކެވެން ޖެހޭ މައުޟޫއެއް ކަމަށެވެ. “މައިވަންތަކަމަކީ މުޅި އަމިއްލަވަންތަކަން ބަދަލުކޮށްލާ ކަމެއް. އެއީ މުޅީން އާ ދުނިޔެއެއް، އަދި އެ ވަގުތު އެކަމުގެ ތެރެއިން ދާ އަންހެނާއަށް އަމިއްލަ ނަފުސަށް ލުއިދޭން އުނދަގޫވޭ،” ކިއާރާ ބުންޏެވެ. އޭނާ އިތުރަށް ފާހަގަކުރި ގޮތުގައި މި އާ ދިރިއުޅުމަށް ހޭނުމަށް އޭނާއަށް ހަ މަސްދުވަސް ނެގިއެވެ.

ޕޮޑްކާސްޓްގައި ޖަޒުބާތީވަމުން ކިއާރާ ބުނީ، މައިން އާންމުކޮށް އެހެން މީހުންނަށްޓަކައި ގިނަ ކަންތައްތަކެއް ކޮށްދޭތީ އަމިއްލަ ނަފުސާ އޮންނަ ގުޅުން ހަނދާންނެތޭ ކަމަށެވެ. ނަމަވެސް ދަރިފުޅު އުފަންވުމަށްފަހު އަމިއްލަ ނަފްސަށް ވަގުތު ދިނުމާއި، ބިރުތަކާ ދުރަށް ދިއުމަށް ދަސްކޮށްފައިވާ ކަމަށް އޭނާ ބުންޏެވެ.

ކިއާރާގެ މި ވާހަކަތަކާ ގުޅިގެން ސިއްހީ މާހިރުންނާއި އާންމުން އަންނަނީ މައިންގެ ނަފްސާނީ ދުޅަހެޔޮކަމާ ގުޅޭގޮތުން ހުޅުވާލައިގެން ވާހަކަދެއްކުމުގެ މުހިންމުކަން ފާހަގަކުރަމުންނެވެ. ހާއްސަކޮށް މުނިފޫހިފިލުވުމުގެ ދާއިރާގައި މައިވަންތަކަން ހަމައެކަނި އުފާވެރި ކަމެއްގެ ގޮތުގައި ދައްކުވައިދޭ ދައްކުވައިދިނުމާ ހިލާފަށް، ކިއާރާ ހިއްސާކުރި ހަގީގީ ތަޖުރިބާއަށް ގިނަ ބަޔަކު އަންނަނީ ތައުރީފުކުރަމުންނެވެ.