24 haafizaku dhavenivejje, ginaee 18 aharun dhashuge haafizun

ކީރިތި ގުރުއާން ހިތުދަސްކުރި 24 ހާފިޒަކު ދަސްވެނިވެއްޖެއެވެ.

މިއަހަރު ދަސްވެނިވި ހާފިޒުންނަށް ސަނަދު އެރުވުމަށްޓަކައި އިސްލާމީ މަރުކަޒުގެ ޖަލްސާކުރާ މާލަމުގައި މިރޭ ވަނީ އެކަމަށްޓަކައި ހާއްސަ ޖަލްސާއެއް ބާއްވައިފައެވެ. އެ ޖަލްސާގައި ހާޒިފުންނަށް ސަނަދު އެރުވީ ރައީސް ޑރ. މުހައްމަދު މުއިއްޒެވެ.

މިއީ ސަރުކާރުން ވަކި ޖަލްސާއެއްގެ ގޮތަށް ހާފިޒުންގެ ދަސްވެނިވުން ފާހަގަކުރާ ފުރަތަމަ ފަހަރެވެ. މީގެ ކުރިން ދަސްވެނިވާ ހާފިޒުންނަށް ސަނަދު އަރުވާފައިވަނީ ގުރުއާން ކިޔެވުމުގެ ގައުމީ މުބާރާތުގެ ނަތީޖާ ފާޅުކުރުމަށް ބާއްވާ ޖަލްސާގެ ތެރެއިންނެވެ.

މިރޭގެ ޖަލްސާގައި ވާހަކަދައްކަވަމުން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ މިއަދަކީ އިސްލާމީ ފަހުރުވެރި ތާރީހަށް އާ ސަފުހާއެއް ހުޅުވިގެންދިޔަ ދުވަސް ކަމަށާއި މީގެ ކުރިން ވަކި ކަމެއްގެ ގޮތުގައި އެކަން ފާހަގަނުކުރުމުން ހައްގު ގަދަރު ދެވިފައިނުވާ ކަމަށެވެ. ނަމަވެސް ދެން ކޮންމެ އަހަރަކު ވެސް ވަކި ޖަލްސާއެއްގެ ގޮތަށް ހާފިޒުންގެ ދަސްވެނިވުން ފާހަގަކުރާނެ ކަމަށް މިނިސްޓަރު ވިދާޅުވިއެވެ.

މިރޭ ދަސްވެނިވި 24 ހާފިޒުންގެ ތެރެއިން 22 ހާފިޒުންނަކީ އުމުރުން 18 އަހަރުން ދަށުގެ ހާފިޒުންނެވެ. އޭގެ ތެރެއިން ގިނަ ހާފިޒުންނަކީ މިއަހަރުގެ ރަމަޟާން މަހުގައި އެކި މިސްކިތްތަކުގެ ތަރާވީސް ނަމާދުގެ އިމާމުންނެވެ.

އެ ހާފިޒުންގެ ތެރެއިން އެންމެ ހަގު ހާފިޒުންގެ އުމުރަކީ 12 އަހަރެވެ. އުމުރުން 12 އަހަރުގެ ތިން ހާފިޒަކު ހިމެނޭ އިރު، އޭގެ ތެރެއިން ދެ ހާފިޒުންނަކީ މިސްކިތްތަކުގައި ތަރާވީސް ނަމާދުކުރާ އިމާމުންނެވެ.