ރައްޔިތުންގެ މަޖިލީހުގައި މިހާރު މެންބަރުން ހިމެނޭ ގޮތް ބަދަލުކޮށް، މަޖިލީހުގައި ތިބޭނީ 76 މެންބަރުން ކަމަށް ކަނޑައަޅަން، ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިސްވެ އުފެއްދެވި ދަ ޑިމޮކްރެޓްސްގެ ރިޔާސީ ކެންޑިޑޭޓް، ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބު ގާނޫނުއަސާސީއަށް އިސްލާޙު ގެންނަވަން ހުށަހެޅި ބިލު މަޖިލީހުން ބޭރު ކޮށްލައިފިއެވެ.

މި ބިލު މަޖިލީހަށް ހުށަހަޅުއްވަމުން އިލްޔާސް ލަބީބު ވިދާޅުވެފައިވަނީ، މި އިސްލާހުތަކަކީ މަޖިލީހުގެ ކޮންމެ ދައުރެއް ނިމޭ އިރު، މެންބަރުންގެ އަދަދު އިތުރުވެ، މަޖިލިސް ބޮޑުވެގެން ދިއުން ހުއްޓުވުމަށާއި އެކަމުގެ ސަބަބުން ބަޖެޓަށް ބާރު ބޮޑުވެ ދައުލަތުގެ ހަރަދުތައް އިތުރުވަމުންދާތީ އެކަަމަށް ލުޔެއް ގެނައުމަށް ހުށަހެޅުއްވި އިސްލާހެއް ކަމަށެވެ.

މީގެ އިތުރުން މަޖިލީހުގައި މިހާރު ތަމްސީލުކުރާ ކުދި ދާއިރާތަކުގެ ބަދަލުގައި މުޅި ރާއްޖެ ތަމްސީލު ކުރެވޭގޮތަށް މަޖިލީހުގައި މެންބަރުން ހިމެނުންވެސް މި އިސްލާހުތައް ގެންނަން ހުށަހެޅި ސަބަބުތަކުގެ ތެރޭގައި ހިމެނޭ ކަމަށްވެސް ވިދާޅުވިއެވެ.

ރައްޔިތުންގެ މަޖިލީހުގައި މިހާރު 87 މެންބަރުން ތިއްބަވާ އިރު، މަޖިލިސް އެތުރިފައި ވަނީ، ކޮންމެ 5,000 މީހަކަށް މެންބަރަކު ތަމްސީލުކުރާ ގޮތަށެވެ. އެހެންކަމުން ދާއިރާތަކަށް ރައްޔިތުން އިތުރުވާ ނިސްބަތުން މަޖިލީހުގެ ކޮންމެ ދައުރެއް ނިމި، އިންތިހާބު ބާއްވާ އިރު މަޖިލީހަށް މެންބަރުންވެސް އިތުރުވެއެވެ. އެގޮތުން މި ހިނގާ ދައުރު ނިމި، އަންނަ އަހަރު މަޖިލީހަށް މެންބަރުން އިންތިހާބު ކުރާ އިރު، ހަ ދާއިރާ އިތުރުވާނެ ކަމަށް އިލެކްޝަންސް ކޮމިޝަން (އީސީ) ވަނީ ބުނެފައެވެ.

އެހެންކަމުން އިލްޔާސް ލަބީބު ހުށަހަޅުއްވާފައިވަނީ މަޖިލިސް މެންބަރުންގެ އަދަދު 76 ގައި ހިފެހެއްޓުމަށެވެ.

"އަތޮޅުތަކުން މާލެއާ ލައިގެން 55 މެންބަރުން މަޖިލީހަށް އިންތިހާބު ކުރާ ގޮތަށް އަޅުގަނޑުމެން މި ހުށަހަޅަނީ، އޭގެ އިތުރަށް މަޖިލީހުގައި އަންހެން މެންބަރުން ވަރަށް މަދު، އަންހެން މެންބަރުން މަޖިލީހަށް އަންނަން ދަތިތަކެއް، އުނދަގޫ ތަކެއް އެބަހުރި. އެހެންކަމުން އަޅުގަނޑުމެން މި ކަނޑައަޅަނީ ރާއްޖޭގެ އެކި ސަރަހައްދުތަކުގައި، ހާއްސަކޮށް އުތުރު، ހުޅަނގު، މެދު، އަދި ދެކުނުން ކޮންމެ ސަރަހައްދަކުން އަންހެން ދެ ގޮނޑި ރިޒާވްކުރަން. އަންހެން ބޭފުޅުންނަށް އެކަނި ކުރިމަތި ލެވިގެން އިންތިހާބު ކުރެވޭގޮތަށް. އެހެންވީމާ އަންހެން 8 ބޭފުޅަކަށް ޖާގަ ލިބިގެންދާނެ. އޭގެ އިތުރަށް ނުކުޅެދުންތެރިކަން ހުންނަ ފަރާތްތަކުންވެސް އިންތިހާބުކުރެވޭ ދެ ފަރާތަކަށް މަޖިލިހުގައި ތަމްސީލު ކުރެވޭގޮތަށް ގާނޫނުއަސާސީއަށް މި އިސްލާހު ގެންނަނީ،" އިލްޔާސް ލަބީބު ވިދާޅުވިއެވެ.

މީގެ އިތުރުން މަޖިލީހުގެ އިންތިހާބުގައި، ސިޔާސީ ޕާޓީތަކަށް ވޯޓު ލިބޭ ނިސްބަތުން ގާނޫނުގައިވާ ގޮތުގެ މަތިން ސިޔާސީ ޕާޓީތަކުން އައްޔަންކުރާ 11 މެންބަރުން، މަޖިލިސް މެންބަރުންގެ ގޮތުގައި ތަމްސީލުކުރާނެ ކަމަށްވެސް އިލްޔާސް ލަބީބު ވިދާޅުވިއެވެ. އޭނާ ވިދާޅުވީ "އެއީ ނެޝަނަލިސްޓް 11 މެންބަރުން،" ކަމަށެވެ.

މި ބިލު ބަލައި ގަންނަން ފެނޭތޯ، މަޖިލީހުގެ މިއަދުގެ ޖަލްސާގައި ނެގި ވޯޓުގައި ޖަލްސާގައި ތިބި 63 މެންބަރުންގެ ތެރެއިން ބިލު ބަލައި ގަންނަން ވޯޓު ދެއްވީ އެންމެ 12 މެންބަރުންނެވެ. ބިލު ބޭރުކޮށްލީ ބިލު ބަލައިގެންނަން ނުފެންނަ ކަމަށް 38 މެންބަރުން ވޯޓު ދެއްވައިގެންނެވެ.