ކާރެއްގެ ތެރެއަށް ތުއްތު ކުއްޖަކަށް ހޮޑުލެވުނު ހާދިސާއަކާ ގުޅިގެން، ޑްރައިވަރު ބޮޑު އަދަދަކުން ފައިސާއަށް ޑިމާންޑުކުރި ކަމަށްބުނެ ސޯޝަލް މީޑިއާގައި ފަތުރަމުންދާ ވާހަކަތައް ނަލަ ޓެކްސީން ދޮގުކޮށްފިއެވެ.

ނަލަ ޓެކްސީން މިއަދު ނެރުނު ނޫސްބަޔާނެއްގައި ބުނެފައިވަނީ، ސޯޝަލް މީޑިއާގައި ދައުރުވަމުންދާ ވާހަކަތަކަކީ ކަން ހިނގާފައިވާ ގޮތާ ހިލާފަށް، ހަގީގަތް އޮޅޭގޮތަށް ފަތުރަމުންދާ ވާހަކަތަކެއް ކަމަށެވެ.

މި ހާދިސާއާ ގުޅިގެން ކުއްޖާގެ މަންމަ ސޯޝަލް މީޑިއާގައި އާންމުކުރި ޕޯސްޓެއްގައި ބުނެފައިވަނީ، ހުޅުމާލެއިން މާލެއަށް ކުރި ދަތުރެއްގައި އުމުރުން އެއް އަހަރުގެ ކުއްޖަކަށް ކުއްލިއަކަށް ހޮޑުލެވުމުން ޑްރައިވަރު ހަރުކަށިކޮށް އަމަލުކޮށްފައިވާ ކަމަށެވެ. އަދި ހޮޑު އެޅިފައިވަނީ ކާރުގެ ސީޓުގެ ވަރަށް ކުޑަ ތަންކޮޅަކަށް ކަމަށާއި، ގިނައިން ހުރީ ކުއްޖާގެ ގަޔާއި އޭނާގެ ހެދުމުގައި ކަމަށް އެ ޕޯސްޓުގައި ބުނެފައިވެއެވެ. މީގެ އިތުރުން، ޑްރައިވަރު ޓިޝޫއެއްވެސް ނުދީ 1500 ރުފިޔާއަށް ޑިމާންޑުކުރި ކަމަށާއި، ފަހުން 1000 ރުފިޔާ ނެގި ކަމަށްވެސް ކުއްޖާގެ މަންމަ ތުހުމަތުކޮށްފައިވެއެވެ.

ނަމަވެސް ނަލަ ޓެކްސީން ބުނި ގޮތުގައި، ހުޅުމާލެ ފޭސް ދޭކުން މާލޭގެ ހަތް ނަންބަރު ޖެޓީއަށް އެޕްލިކޭޝަން މެދުވެރިކޮށް ނެގި އެ ދަތުރުމަތީގައި، ބްރިޖު ލައިޓް ކައިރިން ކުއްޖާއަށް ހޮޑުލެވުނުކަން ކަސްޓަމަރު ޑްރައިވަރަށް އެންގިއެވެ. އެ ވަގުތު ކޮތަޅެއް ހުރިތޯ އެހުމުން ސީޓު ކައިރީގައި ކޮތަޅު ހުންނާނެ ކަމަށް ޑްރައިވަރު ބުނި ކަމަށާއި، ކާރުގެ ސީޓަށް ހޮޑު އެޅިފައި ހުރުމުން އާންމުކޮށް ސީޓު ސާފުކޮށްދޭ ތަންތަނުން 1500 ރުފިޔާ ނަގާ ކަމަށް ޑްރައިވަރު ބުނި ކަމަށް އެ ސެންޓަރުން ހާމަކޮށްފައިވެއެވެ.

އެ ސެންޓަރުން ބުނި ގޮތުގައި، ޑްރައިވަރު އެހެން ބުނުމުން ކަސްޓަމަރު ފޯނުން އެހެން މީހަކާ ގުޅައި ޑްރައިވަރާ ވާހަކަދެއްކުވިއެވެ. އަދި ކަސްޓަމަރު ދާން ބޭނުންވި ތަނަށް ގަޑިއަށް ގެންގޮސްދިނުމަށްފަހު، ފޯނުން ވާހަކަދެއްކި ފަރާތް ބުނި ތަނަށް ކާރު ސާފުކުރަން ޑްރައިވަރު ދިޔަ ކަމަށް ނަލަ ޓެކްސީން ބުނެފައިވެއެވެ. އެތަނުން ސާފުކުރެވެން ނެތް ކަމަށް ބުނުމުން، ޖެހިގެން ހުރި ތަނަށް ގޮސް އަގު އެހުމުން 1600 ރުފިޔާ ކަމަށް ބުނި ކަމަށާއި، ނަމަވެސް ވާހަކަދައްކައިގެން އެ އަގު 1000 ރުފިޔާއަށް ކުޑަކުރި ކަމަށް ބަޔާނުގައިވެއެވެ.

މި ކަންކަން ހިނގަމުންދިޔައިރު ޑްރައިވަރު ދިޔައީ ކަސްޓަމަރު ގުޅައިދިން ފަރާތާ ފޯނުން ވާހަކަދައްކަމުން ކަމަށާއި، 1000 ރުފިޔާ ނެގީ އެ ފަރާތާ ވާހަކަދެކެވި އެ އަގަށް އެއްބަސްވެގެން ކަމަށް ނަލަ ޓެކްސީން ފާހަގަކޮށްފައިވެއެވެ. އަދި ސާފުކުރަމުންދިޔަ ފޮޓޯވެސް އެ ފަރާތާ ހިއްސާކޮށްފައިވާ އިރު، ސާފުކުރަން ދިޔަ ހަރަދު ފިޔަވައި ކަސްޓަމަރު ކުރި ދަތުރުގެ އަގުވެސް ޑްރައިވަރަށް ލިބިފައިނުވާ ކަމަށް އެ ސެންޓަރުން ބުނެފައިވެއެވެ. ދެ ފަރާތުން ވާހަކަދައްކައިގެން ގޮތަކަށް އެއްބަސްވުމަށްފަހު، ޑްރައިވަރާއި ސެންޓަރުގެ އަގު ވެއްޓޭގޮތަށް ހަގީގަތް އޮޅުވާލައިގެން ވާހަކަ ފެތުރުމަކީ ކަންބޮޑުވާ ކަމެއް ކަމުގައި ނަލަ ޓެކްސީން ވަނީ ބުނެފައެވެ.