މި އަހަރުގެ އިސްރަށްވެހިންގެ ދުވަހާ ގުޅުވައި "ދުޅަހެޔޮ އިސްރަށްވެހިން" ގެ ނަމުގައި އެޗްޑީސީއާއި ހެލްތު މިނިސްޓްރީ ގުޅިގެން ހާއްސަ ޕްރޮގުރާމެއް ފަށައިފިއެވެ.

އެޗްޑީސީން މިއަދު ބުނީ މި ޕްރޮގްރާމަކީ ހުޅުމާލޭގައި ދިރިއުޅޭ އިސްރަށްވެހިންގެ ދުޅަހެޔޮކަން އިތުރުކޮށް، އިޖުތިމާއީ ގުޅުންތައް ބަދަހިކުރުމަށް ކުރިއަށް ގެންދާ ޕްރޮގްރާމެއް ކަމަށެވެ.

މިއަހަރުގެ އިސްރަށްވެހިންގެ ދުވަސް ފާހަގަކުރުމަށް މިއަދު ހެނދުނު ހުޅުމާލޭ ސެންޓްރަލް ޕާކުގައި ކުރިއަށްގެންދިޔަ ހަރަކާތުގެ ތެރެއިން، މި ޕްރޮގުރާމު އިފްތިތާހުކޮށްދެއްވީ، ހެލްތު މިނިސްޓަރު ގީލާ އަލީއެވެ.

މި ޕްރޮގްރާމަކީ ގިނަ އިސްރަށްވެހިން އަބަދު ގޭގައި ތިބެންޖެހޭ ޖެހުމާއި އިޖުތިމާއީ ހަރަކާތްތަކުން އެކަހެރިވުން ނައްތާލައި، އެފަރާތްތަކަށް އުފާވެރި އަދި ހަރަކާތްތެރި މާހައުލެއް ގާއިމުކޮށްދިނުމުގެ މަގުސަދުގައި ރާވާފައިވާ ހަރަކާތެއް ކަމަށެވެ. އެގޮތުން، މި ޕްރޮގްރާމްގައި ބައިވެރިވާން އެދޭ އިސްރަށްވެހިންނަށް ރަޖިސްޓްރޭޝަނާއި ސެޝަންތަކުގައި ބައިވެރިވުން މުޅިން ހިލޭ ހަމަޖެހިގެންދާނެ ކަމަށް ވެސް އެޗްޑީސީން ބުންޏެވެ.

މި ހަރަކާތާއެކު ކޮންމެ ހަފުތާއަކު ވެސް ތިން ދުވަހު، އިސްރަށްވެހިންގެ އުމުރާ ގުޅޭގޮތަށް ރޭވިފައިވާ ލުއި ކަސްރަތުތަކާއި ހިނގުމާއި ސްޓްރެޗިން އަދި ނޭވާލުމުގެ ކަސްރަތުތައް ކުރިއަށްގެންދާނެއެވެ. އަދި "ގޯލްޑަން އަވާ"ގެ ނަމުގައި ހަފުތާއަކު އެއްފަހަރު ނުވަތަ ކޮންމެ ދެ ހަފުތާއަކުން އެއް ދުވަހު، އިސްރަށްވެހިންނަށް ހާއްސަކޮށްގެން ބާއްވާ ހަވީރުގެ ސައެއް އޮންނާނެ ކަމަށް ވެސް އެޗްޑީސީން ބުންޏެވެ.

އެޗްޑީސީ އާއި ހެލްތު މިނިސްޓްރީ ގުޅިގެން "ދުޅަހެޔޮ އިސްރަށްވެހިން" ގެ ނަމުގައި މި އަހަރުގެ އިސްރަށްވެހިންގެ ދުވަހާ ގުޅުވައި ކުރިއަށް ގެންދާ ހާއްސަ ޕްރޮގުރާމް-- ފޮޓޯ: އެޗްޑީސީ

އޭގެ އިތުރުން، މަހަކު އެއްފަހަރު ކުޑަގިރި ނުވަތަ އެނޫންވެސް ހިތްފަސޭހަ ކައިރި ރަށަކަށް ދަތުރުގޮސް، އުފާވެރި މާހައުލެއްގައި އިސްރަށްވެހިންނަށް ވަގުތު ހޭދަކުރުމަށް ހާއްސަ ހަރަކާތަކާއި އަހަރުގެ ކޮންމެ ކުއާޓަރަކު އެއްފަހަރު، އިސްރަށްވެހިންގެ ލޭގެ ޕްރެޝަރު ބެލުން ފަދަ މެޑިކަލް ޗެކަޕްތައް ހެދުމާއި ކުޑަކުދިންނާއި ޒުވާނުންނަށް އިސްރަށްވެހިންގެ ފަރާތުން ސަގާފީ މައުލޫމާތު ހިއްސާކުރުމުގެ ހަރަކާތްތައް ބޭއްވުމަށް މި ޕްރޮގުރާމުގެ ތެރެއިން ވަނީ ހަމަޖެހިފައެވެ.

މި ޕްރޮގްރާމްގެ ހުރިހާ ހަރަކާތްތަކެއްގައި ވެސް ބައިވެރިންގެ ރައްކާތެރިކަމާއި ސިއްހީ ހާލަތަށް ހާއްސަ ސަމާލުކަމެއް ދިނުމުގެ ގޮތުން ބައިވެރިންނަށް ބޭނުންވާ ދަތުރުފަތުރުގެ އިންތިޒާމުތައް ހަމަޖައްސައިދިނުމުގެ އިތުރުން، ސެޝަންތައް ކުރިއަށްދާ ވަގުތު ފަސްޓްއެއިޑްގެ ހިދުމަތާއި ބޯފެނާއި އަރާމުކުރާނެ އިންތިޒާމުތައް ހަމަޖައްސާފައި ހުންނާނެ ކަމަށް ވެސް އެޗްޑީސީން ބުންޏެވެ.

މި ޕްރޮގްރާމަކީ އެޗްޑީސީ އަދި ހެލްތު މިނިސްޓްރީގެ އިތުރުން ހުޅުމާލެ ހޮސްޕިޓަލާއި ފުލުހުންނާއި ފިޒިއޯ ސޮލިއުޝަންސް އާއި ޕެންޝަން އޮފީހާއި އެމްޓީސީސީ އަދި އުރީދޫގެ އިތުރުން އެކިއެކި އެންޖީއޯތަކުގެ އެއްބާރުލުމާއެކު ކުރިއަށްގެންދާ ޕްރޮގުރާމެކެވެ.

އެޗްޑީސީގެ އަމާޒަކީ، މި ޕްރޮގްރާމްގެ ސަބަބުން އިސްރަށްވެހިންގެ ސިއްހީ އަދި ނަފްސާނީ ދުޅަހެޔޮކަން އިތުރުވެ، މުޅި ހުޅުމާލެއަކީ ހުރިހާ އުމުރެއްގެ ރައްޔިތުންނަށްވެސް އުފަލާއެކު އުޅެވޭނެ ހިތްފަސޭހަ މުޖުތަމައަކަށް ހެދުން ކަމަށް ވެސް އެކުންފުނިން ބުންޏެވެ.