ޔުނައިޓެޑް އަރަބް އެމިރޭޓްސް (ޔޫއޭއީ) އިން ފުރައިގެން އިސްރާއީލަށް ދަތުރުކުރަމުންދިޔަ ފްލައިދުބާއީގެ ބޯޓެއްގެ ކޮކްޕިޓް ތެރޭގައި ޕައިލެޓުންގެ މެދުގައި ހިނގި މާރާމާރީއަކާ ގުޅިގެން، ސައޫދީ އަރަބިއްޔާގެ ތަބޫކަށް އެ ބޯޓު އިމަޖެންސީގައި ޖައްސައިފިއެވެ.

ރިޕޯޓުތައް ބުނާ ގޮތުގައި ފްލައިދުބާއީގެ ފްލައިޓް އެފްޒެޑް1073 ގައި 170 ފަސިންޖަރުން ތިއްބެވެ. ފްލައިޓްރާޑާ24 އިން ދައްކާ ގޮތުގައި، ދުބާއީއިން ފުރިތާ ދެ ގަޑިއިރާއި ބައި ފަހުން ބޯޓުން ވަނީ އާންމު އިމަޖެންސީ ސިގްނަލެއް ފޮނުވައިފައެވެ. އަދި އޭގެ ފަހުން ގާނޫނާ ހިލާފު އަމަލެއް ހިނގަމުންދާ ކަމުގެ ސިގްނަލެއް ވެސް ފޮނުވިއެވެ. މި ބޯޓު ވަނީ 30 ސިކުންތުގެ ތެރޭގައި 33،000 ފޫޓުން 17،000 ފޫޓަށް ތިރިކޮށްފައެވެ. އޭގެ ފަހުން އުރުދުންގެ ބޯޑަރާ ކައިރީގައި އާދަޔާ ހިލާފު ގޮތަކަށް އެނބުރުމަށްފަހު، ގާތްގަނޑަކަށް ގަޑިއިރެއްހާއިރު ފަހުން ތަބޫކަށް ޖެއްސިއެވެ.

މީޑިއާތަކަށް މައުލޫމާތުދެމުން ފަސިންޖަރުން ބުނި ގޮތުގައި، ކޮކްޕިޓް ތެރޭގައި ދެ ޕައިލެޓުންގެ މެދުގައި މާރާމާރީ ހިނގައި އެކަކަށް ވަނީ ވަޅިއަކުން ހަމަލާދީފައެވެ. ކޮކްޕިޓްގެ ދޮރު ހުޅުވުނުއިރު އެތެރޭގައި ލޭ ހުރި ކަމަށާއި، ފަސިންޖަރުން ވަދެ އަނެއް ޕައިލެޓު ހުއްޓުވީ ކަމަށް ފަސިންޖަރަކު ބުންޏެވެ. މި ހާދިސާއަށްފަހު ބޯޓު ކޮންޓްރޯލްކޮށް ސަލާމަތުން ޖެއްސީ ފަސިންޖަރުންގެ ގޮތުގައި ދަތުރުކުރި އޮފް-ޑިއުޓީ ދެ ޕައިލެޓުންނެވެ.

ތަބޫކް އެއާޕޯޓުން ނެރުނު ބަޔާނެއްގައި ބުނެފައިވަނީ މި ހާދިސާގައި ދެ ޕައިލެޓުންނަށް ވެސް އަނިޔާވެ ހޮސްޕިޓަލުގައި ފަރުވާދީފައިވާ ކަމަށެވެ. އިސްރާއީލުގެ އޮފިޝަލަކާ ހަވާލާދީ އެސޯސިއޭޓެޑް ޕްރެސް (އޭޕީ) އިން ރިޕޯޓުކޮށްފައިވާ ގޮތުގައި، މިއީ އިސްރާއީލުގެ ރައްޔިތުންނަށް އަމާޒުކޮށް ދިން ހަމަލާއެއް ކަމަށް ބެލެވޭތީ މި މައްސަލަ ދަނީ ތަހުގީގުކުރަމުންނެވެ. ބޯޓުން އިމަޖެންސީ ސިގްނަލް ދިނުމާއެކު، ބޯޓު ހައިޖެކްކޮށްފާނެ ކަމުގެ ބިރަށް އިސްރާއީލުން ވަނީ ހަނގުރާމަމަތީ މަތިންދާބޯޓުތައް ވެސް ފޮނުވައިފައެވެ.

ފްލައިދުބާއީއިން ބުނީ ބެން ގޫރިއަން އެއާޕޯޓަށް ދަތުރުކުރި ބޯޓަށް ދިމާވި ހާދިސާއަކާ ގުޅިގެން ތަބޫކަށް ސަލާމަތުން ޖައްސާފައިވާ ކަމަށާއި، ހުރިހާ ފަސިންޖަރުން ވެސް ސަލާމަތުން ތިބި ކަމަށެވެ. އަދި ކަމާބެހޭ ފަރާތްތަކާއެކު މަސައްކަތްކުރަމުންދާ ކަމަށް އެ އެއާލައިނުން ބުންޏެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ބުނީ ހާލަތު ކޮންޓްރޯލްކުރެވިފައިވާ ކަމަށާއި، ފަސިންޖަރުން އަނބުރާ ގައުމަށް ގެނައުމުގެ މަސައްކަތް ކުރަމުންދާ ކަމަށެވެ.