ވަގަށް ރާއްޖެއަށް އެތެރެކުރި 8 މިލިޔަނަށްވުރެ ގިނަ ސިނގިރޭޓު ކަސްޓަމްސްއިން އަތުލައިގެންފިއެވެ.

މި ތަކެތި އަތުލައިގަތީ ކަނޑުމަގުން ރާއްޖެއަށް އެތެރެކުރި ޝިޕްމަންޓެއްގެ ތެރެއިންނެވެ.

‏ކަސްޓަމްސްއިން އެކްސްގައި ކުރި ޕޯސްޓެއްގައި ބުނީ މިމަހުގެ 27 ވަނަ ދުވަހު މާލެ ވިޔަފާރި ބަނދަރުގައި ހިންގި ހާއްސަ އޮޕަރޭޝަނެއްގައި "ޖެނެރަލް ކާގޯ"ގެ ގޮތުގައި ޑިކްލެއާކޮށްފައިވާ ޝިޕްމަންޓެއް ބަލައި ފާސްކުރުމުގެ ތެރޭގައި ގިނަ އަދަދެއްގެ ސިނގިރޭޓް ފޮރުވާފައި ހުއްޓައި ފެނިފައިވާ ކަމަށެވެ.

އެގޮތުން ޖުމްލަ 8،527،480 ސިނގިރޭޓް ސްޓިކްސް ފެނިފައިވާ ކަމަށް ކަސްޓަމްސްއިން ބުންޏެވެ، އެއީ 426،374 ފޮއްޓެވެ.

ކަސްޓަމްސްއިން ބުނީ އެތަކެތި ކަސްޓަމްސްގެ ބެލުމުގެ ދަށަށް ގެނެސްފައިވާ ކަމަށެވެ.

މި މައްސަލަ އިތުރަށް ތަހުގީގުކުރަމުން އަންނަ ކަމަށް ވެސް ކަސްޓަމްސްއިން ބުންޏެވެ.

މީގެ ކުރިންވެސް އެކި ފަހަރު މަތިން ކަސްޓަމްސްއިން ވަނީ ރާއްޖެއަށް ވަގަށް އެތެރެކުރަން އުޅުނު ސިނގިރޭޓް އަތުލައިގެންފައެެވެ.