ދިވެހި ޕައިލެޓުން ތަމްރީން ކުރުމުގެ ހުއްދަ ސްލޮވީނިއާގެ ކުންފުންޏަކަށް ދީފިއެވެ.

ސްލޮވީނިއާގެ އޭވިއޭޝަން ކެރިއާ ސެންޓަރު (އޭސީސީ) އަށް މޯލްޑިވްސް ސިވިލް އޭވިއޭޝަން އޮތޯރިޓީ (އެމްސީއޭއޭ) އިން އެޕްރޫވްޑް ޓްރެއިނިން އޯގަނައިޒޭޝަން (އޭޓީއޯ) 017ގެ ހުއްދަ ދޫކޮށްފައިވަނީ މިމަހުގެ 20 ވަނަ ދުވަހުއެވެ.

އޭސީސީން އިއްޔެ ނެރުނު ނޫސްބަޔާނެއްގައި ބުނީ، މިއީ އެ މަރުކަޒުން ބައިނަލްއަގުވާމީ ފެންވަރުގައި ފުޅާވުމަށް ކުރަމުން އަންނަ މަސައްކަތުގައި ލިބުނު ވަރަށް މުހިންމު ކުރިއެރުމެއް ކަމަށެވެ.

މި ހުއްދައިގެ ދަށުން ސިވިލް އޭވިއޭޝަނުން ފާސްކޮށްފައިވާ ޕައިލެޓް ތަމްރީނު ޕްރޮގްރާމްތައް ހިންގުމުގެ އިހުތިޔާރު އޭސީސީއަށް ލިބޭނެއެވެ. އޭގެ ތެރޭގައި ޕްރައިވެޓް ޕައިލެޓް ޓްރެއިނިން އާއި އިންޓަގްރޭޓެޑް އަދި މޮޑިއުލާ ކޮމާޝަލް ޕައިލެޓް ޓްރެއިނިންގެ އިތުރުން އެއާލައިން ޓްރާންސްޕޯޓް ޕައިލެޓް ޓްރެއިނިން ހިމެނެއެވެ.

މީގެ އިތުރުން އިންސްޓްރޫމަންޓް ރޭޓިން އާއި މަލްޓި އެންޖިން ޕިސްޓަން ކްލާސް ރޭޓިން އާއި ނައިޓް ރޭޓިންގެ އިތުރުން މަލްޓި ކްރޫ ކޯޕަރޭޝަން (އެމްސީސީ) ވެސް މި ޕްރޮގްރާމްތަކުގެ ތެރޭގައި ހިމެނެއެވެ. އަދި ފްލައިޓް އިންސްޓްރަކްޓަރުންނާއި ކްލާސް ރޭޓިން އަދި އިންސްޓްރޫމަންޓް ރޭޓިން އިންސްޓްރަކްޓަރުން ތަމްރީނުކުރުމުގެ ކޯސްތައް ވެސް ހިންގުމުގެ ހުއްދަ ވަނީ ދީފައެވެ.

މި ހުއްދައާ އެކު ރާއްޖޭގެ ސިވިލް އޭވިއޭޝަނުން ކަނޑައަޅާފައިވާ އޮނިގަނޑުގެ ތެރެއިން ޕައިލެޓްކަން ކިޔަވަން ބޭނުންވާ ދިވެހި ދަރިވަރުންނަށް ސްލޮވީނިއާގައި ތަމްރީން ހެދޭނެއެވެ.

ޒެނިތު އޭވިއޭޝަން އެކަޑެމީއާ ގުޅިގެން އައްޑޫ ސިޓީގެ ގަމުގައި ޕައިލެޓުން ތަމްރީނު ކުރުމުގެ މަސައްކަތް ވެސް ހިނގަމުންދެ އެވެ.

ދިވެހި ގިނަ ޒުވާނުން ޕައިލެޓްކަން ކިޔަވަމުންދާ އިރު، އައްޑޫ ސިޓީގެ ގަމުގައި ޕައިލެޓުން ތަމްރީނު ކުރުމުގެ މަސައްކަތްވެސް ޒެނިތު އޭވިއޭޝަން އެކަޑެމީއާ ގުޅިގެން ކުރިއަށް ދެއެވެ. އަދި ގިނަ ދިވެހީން އާއްމުކޮށް ޕައިލެޓުކަން ކިޔަވަނީ ފިލިޕީންސް އާއި ސްރީލަންކާ އާއި އެމެރިކާގެ އިތުރުން ސްޕެއިންގައެވެ.