މާލޭގައި ހަދާ ޒަމާނީ މާރުކޭޓު ހިންގާނީ މިފްކޯއިން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސް ޑރ. މުހައްމަދު މުއިއްޒު ވިދާޅުވީ މިފްކޯއާ އެގްރޯނެޓާ ސަބްސިޑިއަރީއެއް ގޮތުގައި ގުޅިގެން ދިއުމުން، ހާސިލުވެގެންދާނެ ވަރަށް ގިނަ ފައިދާތައް އެބަހުރި ކަމަށެވެ.

"އެއް ކުންފުނި އަނެއް ކުންފުންޏާ އެކުގައި ކުރެވިގެން ގެންދެވިދާނެ ކިތަންމެ ކަމެއް އެބަހުރި. އެހެންވީމަ އެ މަސައްކަތް ކުރުމަށްޓަކައި، ރާއްޖޭގައި އެގްރޯނެޓުގެ ވިޔަފާރި ފުޅާކުރުމަށްޓަކައި ސަރުކާރުގެ ފުޑް ސެކިއުރިޓީ ޓާގެޓް ހާސިލުކުރުމަށްޓަކައި ކުރަން ހުރި ކަންކަމުގަވެސް، ދަނޑުވެރިކަމުގެ ސިނާއަތް ފުޅާކުރަން ހުރި ކަންކަމުގަވެސް މަސްވެރިކަމާ ދަނޑުވެރިކަމާ އެކުގައި ކުރެވޭ ގޮތަށް ރޭވިގެން ދިޔުމުން ވަރަށް ގިނަ ފައިދާތައް ވާނެ. އެހެންވީމަ ސަބްސިޑިއަރީއެއް ގޮތުގައި މިފްކޯގެ، ސަބްސިޑިއަރީއެއް ގޮތުގައި އެގްރޯނެޓް ބަދަލުކުރުމަށް މިވަނީ ނިންމާފައި،" އެމަނިކުފާނު ވިދާޅުވިއެވެ.

ރައީސް ވިދާޅުވީ މިފްކޯގެ ދަށަށް އެގްރޯނެޓް ގެނެވި، މިގޮތަށް ބަދަލުވެގެން ދިއުމަށްފަހު، މާލޭގައި މިހާރު ސަރުކާރުން އަޅަން ފަށަން ނިންމައި، އެޅުމުގެ މަސައްކަތް ފެށުމަށް ތައްޔާރީތައް ވަމުންދާ މިކްސްޑް މާކެޓް، މަސްވެރިންގެ އަދި ދަނޑުވެރިންނާ އެކި ފަރާތްތަކުގެ ތަކެތި ވިއްކުމަށްޓަކައި ގާއިމުކުރާ ޒަމާނީ މާކެޓް ހަދައި ނިމުމުން އެތަން ހިންގައި އޮޕަރޭޓް ކުރުން މިފްކޯއާ ހަވާލުކުރިގެންދާނެ ކަމަށެވެ.

އެކަން ކުރުމަށްވެސް މިހާރު ނިންމަވާފައިވާ ކަމަށާއި އެއީ ދެމެހެއްޓެނިވި ގޮތެއްގައި އެތަން ހިންގައި، އާންމު ވިޔަފާރިތަކަށް، އާންމު ރައްޔިތުންނަށް އެންމެ ފައިދާވާނެ ގޮތަށް ސަރުކާރުން ހަރަދުކުރަން ނުޖެހޭ ގޮތަށް، ރަނގަޅަށް ބެލެހެއްޓޭނެ ގޮތަށް ހިންގުމަށްޓަކައި ކަމަށް އެމަނިކުފާނު ވިދާޅުވިއެވެ.

"އިރާދަކުރެއްވިއްޔާ އެ މިކްސްޑް މާކެޓް މިއަންނަ އަހަރުގެ ޑިސެމްބަރު 20 އަށް ނިންމޭތޯ މަސައްކަތް މި ކުރަނީ. ލަސްތަކެއް ވެގެން ދިޔަ، އެ ތަފްސީލުވެސް މުއައްސަސާތަކުން ދެއްވާނެ. އެހެންނަމަވެސް އިރާދަކުރެއްވިއްޔާ މިހާރު އެ އެ ހާޑްލްތައް އޯވާކަމް ކުރެވިއްޖެ ކަމަށް ބެލެވެނީ. އެހެންނަމަވެސް އަދި މުޅިއަކުން ނުނިމޭ ސާފެއް ނޫން. އެހެންނަމަވެސް މަސައްކަތްތައް އެބަ ކުރެވޭ،" އެމަނިކުފާނު ވިދާޅުވިއެވެ.